02/3/19 1:01 PM

పవన్ కళ్యాణ్‌కి చంద్రబాబు చెక్ : రంగంలోకి సూపర్ స్టార్

CM Chandrababu New Sketch For Pawan Kalyan

పవన్ కళ్యాణ్‌కు చెక్ చెప్పేందుకు చంద్రబాబు కొత్త ఎత్తుగడ వేశారా? పవన్ కళ్యాణ్‌కు పోటీగా మరో స్టార్ హీరోని చంద్రబాబు చేరదీయనున్నారా? పవన్‌కి పోటీగా స్టార్ హీరో మహేష్ బాబుని రంగంలోకి దింపనున్నారా? ప్రస్తుత రాజకీయ పరిణామాలు చూస్తుంటే ఈ సందేహాలు కలుగుతున్నాయి. 2014 ఎన్నికల్లో టీడీపీకి సపోర్ట్ చేసిన జనసేన అధినేత పవన్ కళ్యాణ్ ఈ ఎన్నికల్లో ఒంటరిగా బరిలోకి దిగుతున్నారు. గెలుపే లక్ష్యంగా వ్యూహలు రచిస్తున్నారు. చంద్రబాబు ఓటమే లక్ష్యంగా పెట్టుకున్నారు. దీంతో చంద్రబాబు కూడా పవన్‌కి చెక్ చెప్పేందుకు వ్యూహలు రచిస్తున్నారు. అందులో భాగంగా ఇండస్ట్రీకి చెందిన సూపర్ స్టార్ మహేష్ బాబుని అస్త్రంగా వాడుకోనున్నారని సమాచారం.

 

పవన్ కళ్యాణ్ దూరమైన లోటును మహేశ్ బాబుతో పూడ్చుకోవడానికి టీడీపీ ప్రయత్నిస్తోందని సమాచారం. సూపర్ స్టార్ క్రిష్ణ సోదరుడు ఘట్టమనేని ఆదిశేషగిరి రావును పార్టీలో చేర్చుకోవడం ద్వారా మహేశ్ మావాడే అనే సంకేతాలు పంపే పనిలో చంద్రబాబు ఉన్నారట. ఇటీవలే వైసీపీకి రాజీనామా చేసిన సూపర్ స్టార్ కృష్ణ సోదరుడు ఆదిశేషగిరి రావు త్వరలోనే టీడీపీలో చేరనున్నారు. టీడీపీ నేతల బృందం బుర్రిపాలెం వెళ్లి ఆయన్ను పార్టీలోకి ఆహ్వానించనుంది. బుద్ధా వెంకన్న, ఆలపాటి రాజా, గద్దె రామ్మోహన్ రావు, వర్ల రామయ్య, జలీల్ ఖాన్ తదితరులు ఇందుకోసం బుర్రిపాలెం వెళ్తున్నారు. జగన్ పార్టీలో ఉన్న ఆదిశేషగిరి రావు ఇటీవలే ఆ పార్టీకి రాజీనామా చేసిన సంగతి తెలిసిందే. తన సోదరుడు కృష్ణ మాటే తన మాట అని చెప్పే శేషగిరి రావు వైసీపీని వీడి టీడీపీలో చేరుతుండటం ప్రాధాన్యం సంతరించుకుంది.

 

సూపర్ స్టార్ కృష్ణకు 80ల నుంచే కాంగ్రెస్ పార్టీతో అనుబంధం ఉంది. మొదట్లో ఎన్టీఆర్‌తో అనుబంధం నెరిపినా.. రాజీవ్ గాంధీ హయాం నుంచి ఆయన హస్తం పార్టీలోనే ఉన్నారు. 1989లో ఏలూరు నుంచి ఎంపీగా గెలిచిన ఆయన.. తర్వాతి ఎన్నికల్లో ఓటమి పాలయ్యారు. వైఎస్ రాజకీయాల్లో ఉన్న సమయంలో కృష్ణ ఫ్యామిలీ ఆయనకు నైతిక మద్దతు ప్రకటించింది. ప్రస్తుతం ఆయన ఏ పార్టీకి మద్దతు ఇవ్వడం లేదు.

 

ఆదిశేషగిరి రావు ద్వారా కృష్ణ మద్దతు కూడగట్టాలని టీడీపీ భావిస్తున్నట్టు తెలుస్తోంది. తద్వారా మహేశ్ బాబు అభిమానులను తమ వైపు తిప్పుకోవాలనే యోచనలో తెలుగుదేశం ఉందని టాక్. ఇప్పటికే మహేశ్ బావ గల్లా జయదేవ్ టీడీపీ తరఫున ఎంపీగా కొనసాగుతున్నారు. 2014 ఎన్నికల్లో మహేశ్ తన బావ కోసం ప్రచారం కూడా చేశారు, కానీ రాజకీయాలేమీ పెద్దగా మాట్లాడలేదు. ఈసారి మహేశ్ బాబాయిని కూడా తమ పార్టీలోకి రప్పించడం ద్వారా.. సూపర్ స్టార్ మా వాడేనని ఫ్యాన్స్‌కు సంకేతాలు పంపడమే టీడీపీ ఉద్దేశంగా కనిపిస్తోంది.

 

ఆదిశేషగిరి రావు వ్యాఖ్యలను బట్టి ఆయన కృష్ణకు చెప్పాకే టీడీపీలో చేరుతున్నారని అర్థమవుతోంది. కానీ ఆయన టీడీపీకి అనుకూలంగా నోరు విప్పుతారా లేదా అనేది ఆసక్తికరంగా మారింది. అంతకు మించిన మరో విషయం ఏంటంటే.. మహేశ్ రాజకీయాలకు చాలా దూరంగా ఉంటారు. అలాంటి వ్యక్తి టీడీపీకి ఓటేయమని తన ఫ్యాన్స్‌కు డైరెక్ట్‌గా చెప్పకపోవచ్చు. కానీ ఆదిశేగిరి రావు, గల్లా జయదేవ్‌లను ఎన్నికల బరిలో నిలిపి వారి తరఫున మహేశ్‌‌తో ప్రచారం చేయించడం వల్ల సూపర్ స్టార్‌ ఫ్యాన్స్‌ను తమ వైపు తిప్పుకోవాలని టీడీపీ భావిస్తుండొచ్చు.

 

2014 ఎన్నికల్లో పవన్ కళ్యాణ్ మద్దతుతో టీడీపీ విజయం సాధించింది. ఈ ఎన్నికల్లో మాత్రం టీడీపీ ప్రత్యర్థిగా పవన్ బరిలోకి దిగుతున్నారు. ఇలాంటి తరుణంలో పవన్‌తో సమానమైన ఫ్యాన్ ఫాలోయింగ్ ఉన్న మహేశ్‌ మావాడే అనిపించుకోవాలని టీడీపీ ఆరాట పడుతోందట. మరి చంద్రబాబు వేసిన ఈ స్కెచ్ ఏ మేరకు సక్సెస్ అవుతుందో చూడాలి.

Tags : cm chandrababughattamaneni adisheshagiri raojanasenamahesh babupawan kalyanSuper star Krishnays jaganysrcp

Also read

Use Facebook to Comment on this Post



Menu